Денешното предавање на универзитетот „ФОН“ професорот Стефан Влахов Мицов го посвети на Илинденскиот период. „Ставот на Мисирков за Илинденското востание - во својата книга „За македонцките работи“ велел дека македонското револуционерно движење мора потполно да се еманципира од бугарското влијание. Во спротивен случај овие контакти можат да се користат злонамерно во Бугарија и други странски земји“, рече проф. Стефан Влахов Мицов. Професорот Влахов Мицов говореше и за одгласите на историјата во некои актуелни политички случувања, како што беше предлогот на бугарскиот премиер Прванов за заедничка прослава на Илинден. „Овој предлог беше обид за официјално признавање на бугарските државни фалсификувања на историјата“, вели Влахов Мицов. Овој циклус предавања се одржува како дел од манифестацијата Месец на Мисирков, во организација на фондацијата „Рамковски“, а на денешното предавање присуствуваше и ректорот на универзитетот „ФОН“, Александар Николовски, кој и се заблагодари на фондацијата „Рамковски“ што овозможи врвни познавачи и професори да им предаваат на студентите на „ФОН“. Денеска гостуваше и Доне Донев, професор по книжевност од Кочани. Тој говореше делови од својата монодрама „Меѓникот“, во која главен лик е самиот Крсте Мисирков. „Време е и останатиот свет да разбере дека во Македонија живее македонски народ, не српски, не бугарски, ниту пак, грчки и дека тој народ си има своја историја, свои национални достоинства, свои културни заслуги во културната историја“, изјави проф. Доне Донев. Во Месецот на Мисирков предавања на „ФОН“ ќе одржат истакнати познавачи на делото на Крсте Мисирков од Македонија и од странство. http://a1.com.mk/vesti/default.asp?VestID=85897